Somos la vuestra pior soniadera ye una dinámica internacionalista desenrollata per las organizacions chovenils d’as diferents nacions oprimitas d’o Estau Espanyol: PURNA (Aragón), ERNAI (Euskal Herria), ARRAN (Països Catalans) BRIGA e ISCA! (Galiza) DARRÉU (Asturies), JALEO!!! (Andalucía), YESCA (Castilla), INEKAREN y AZARUG (Canarias).

Manifiesto

En decadas hemos heredato es principals vicios d’o rechimen franquista, que nunca no nos somos canstatas de denunciar: la continuidat d’a politica economica, d’as institucions reciclatas, d’a Espanya indivisible d’o patriarcato més salvache, d’a cruel represión politica… La dita “transición” no fue sino una transaccions de poders en que la placida sucesión d’a Chefatura d’o Estau d’o dictatuero al sucesor eslechito per él mesmo, ye la suya més elevata exprision. Lo paper d’a ezquierda reformista, que s’incorporó a este proceso claudicando e abandonando practicament totas las demandas d’a oposición popular al franquismo, fue fundamental pa lo exito d’o proceso. La ruptura democratica en lo Estau espanyol quedaba e encara queda pendient.

Ara, quan se fa 35 anyos d’a Constitución Espanyola d’o ’78, las organizacions chovenils revolucionarias d’es pueblos baixo churisdicción d’o Estau espanyol, renovamos la nuestra voluntat de prener las riendas d’o nuestro destino en un contexto en que lo dreito a decidir (indistintament d’a suya posible aplicación sobre es nuestros pueblos, es nuestros cuerpos, sobre lo modelo economico, sobre l’uso d’o espacio e d’o entorno, etc.) ye de contino vulnerato. Esta data tan simbolica, orgüello d’o rechimen espanyol que aconsigue imposar en un clima de miedo e tutela d’o Exercito espanyol las suyas reglas de chuego, ye la que hemos eslegito la diferents organizacions chovenils d’es pueblos oprimiz pa anunciar la creación d’un espacio de luita estratechico, siempre dende lo respeto e reconeiximiento a las dinamicas que marcan la fayena a cada territorio e, per tanto, a la sobiranía de totas ellas.

La situación d’a choventut a es nuestro pueblos ye de tot critica: precariedat laboral, desempleu, exilio, ataque a es dreitos sexuals e reproductivos, elitización d’o sistema educativo, empobrecimiento, mercantilización d’es puestos e actividatz d’ocio, negación d’a cultura e lenguas propias etc. Amés, no podemos deixar de denunciar la criminalización e represión a la que lo rechimen espanyol somete a la choventut conseqüent e combatica per desenrollar las nuestras actividatz de luita militant. Tot este panorama, per cuentra, no nos fa cayer en lo desaliento, sino que nos empenta a redoblar esfuerzos en la construcción d’as alternativas existents, tanchibles e serias, que naixcan d’o pueblo e sian per e pa lo pueblo.

Davant lo suyo capitalismo devorador, davant lo suyo imperialismo espanyolizatuero e davant lo patriarcato, la choventut alegre e combativa femos un apueste firmement per la liberación nacional d’es nuestros pueblos, lo feminismo e lo socialismo. La qüestion de chenero, la de clase, e la nacional son es tres eixes de luita prioritarios. Es nuestros movimientos no existeixen pa mendican migallas, naixen pa vencer e pa conquerir lo futuro con la constancia, la conseqüencia e la fortaleza ideolochica que nos caracteriza.

Dende las organizacions chovenils d’es pueblos oprimiz per lo estau espanyol, queremos fer publica la nuestra firma decisión d’avanzar per este camino d’ilusion e esperanza. E especialment, de fer-lo con lo internacionalismo per bandera, sabendo que la destrucción de tot lo entramato institucional d’o Rechimen espanyol, d’a economía criminal capitalista e d’as mentalidatz obsoletas ha d’estar una tarea compartita per totz e totas las que creemos en la chusticia social. Desde aquí desafiamos al Rechimen espanyol e reiteramos lo nuestro firme compromiso de continuar luitando dende es nuestros territorios, día sin altro e coste lo que coste dica aconseguir la plena liberación nacional, social e sexual d’es nuestros pueblos. Mientres no se nos permita sonear… seremos la suya pior soniadera.