Las I Chornatas LGTB “Crememos l’almario” tenioron lugar pa lo primer cabo de semana d’april de 2017.Tres días d’actividatz e carratas con las que s’amostró la realidat d’o movimiento dende un punto de vista transformatuero e critico con lo sistema quo.
La formación ocupó un puesto important en ixas chornatas que lo suyo obchetivo fue reactualizar lo movimiento LGTB pa un nuevo activismo que portás a la choventut sexodisident a protagonizar la luita per es suyos propios dreitos.
Las chornatas encomenzoron lo jueus 29 con la proyección d’a cinta “Romeus”, sobre la realidat trans, e con una charrata baixo lo titol “VIH-SIDA e la choventut” a cargo de l’asociación OMSIDA.
Las actividatz continuoron lo vienres con una tabla retona sobre la historia d’o movimiento LGTB a Aragón e un debat sobre es retos de futuro que este tien. Pero, sen garra duda, lo plato fuert fue lo sabato quan lo youtuber e activista Tigrillo, experto en comunicación choven lgtb a es rez socials, visitó A Enrestida. Amés amés, lo sabato de maitins tenió lugar una charrata sobre l’activismo LGTB en lo pueblo chitano a cargo de l’activista romaní internacional Demetrio Gómez. Como punto e final a estas chornatas, lo dominge de tardes acabemos con la proyección d’o documental “Almarios concentricos”.
Besata sexodisident, un beso sin miedo
Pocas veces, dellá de datas senyalatas como lo 28 de chunyo -día de l’Orgüello LGTB- u lo 17 de mayo -Día Internacional cuentra la Homofobia, la Transfobia e la Bifobia- se deixa veyer la bandera LGTB ondeyando al ritmo d’o viento a es pietz d’o Pilar a Zaragoza. E no perque este “arco de Sant Chuan” no quiera participar u deixar-se veyer, sino perque muitas veces no se siente bienvenito, seguro e visibilizato. Con tot e con ixo, las carreras tamien son nuestras, de totas.
Ye per ixo que lo 2 d’april de 2017, como culminación d’as I Chornatas LGTB “Crememos l’almario”, saliemos t’a carrera pa reivindicar lo nuestro dreito a estar e fer-nos con qui nos petás en lo momento e puesto que fues. Una besata sexodisident, un beso sin brenca miedo que defendés la diversidat afectivo-sexual e d’identidat como uno d’es pilars basicos pa la transformación social. E quála millor manera que a traviés d’algún d’es simbolos més caracteristicos d’a nuestra tierra? La Basilica d’o Pilar e lo trache de baturra.
Querevanos terminar las nuestras chornatas con una acción que metés sobre la tabla la necesidat d’un espacio publico pa las personas LGTB e per ixo nos vestiemos con las nuestras millors galas pa besar-nos con altras personas d’o mesmo chenero.
Entendemos que este acto nos permitiba dotar d’un nuevo significato a tot alló asociato a lo més tradicional, a lo rural u a la familia heteronormativa, entre altros. E ye que dende Purna aspiramos a la reconstrucción d’un activismo e movimiento LGTB que supere la institucionalización e torne a prener las carreras e las plazas. No podemos, en nome d’a normalización, ceder e aceptar identidaz e rols que no son es nuestros e no nos representan.
